amalinks wokungena

Breaking News

Kulabantu eZimbabwe Asebethakazelela Imidlalo yeWorld Cup Edlalelwa Kwele Qatar


URomain Saiss ubobotheka kusanda kuhlohla uAbdelhamid Sabiri, olahle phansi unozinti wakwele Belgium uThibaut Courtois emdlalweni weWorld Cup Group F, odlalelwe enkundleni ye-Al Thumama Stadium eDoha, kwele Qatar.

BULAWAYO - Abalandela imidlalo yenguqu eyokudinga intshantshu yezizwe zomhlaba eqhutshelwa elizweni leQatar bathi lumcintiswano uyabakholisisa kakhulu ngoba kulempumela ebingakhengelelwanga ngabanengi.

Owayengumdlali weqembu lesizwe elamaWarriors, uRonald “Gidiza” Sibanda, uthi lonyaka kulobunzima kumaqembu abekhangelelwe ngabanengi ngoba kumele abophe ziqine nxa efuna ukuphakamisa inkezo.

“Kuyadlalwa sibili kulumncintiswano, kunzima. Siyawabona amadoda ayaginqa ikanti laboRonaldo kanye loMessi okuyibo esibathembileyo bathwele nzima loba benqoba bayavuma ukuba akutshiphanga. Mina iqembu engilesabayo ngeleSpain, eleArgentina like ladliwa kodwa selize lanqoba kodwa kangiliboni kuhle ukuqina kwalo. EleNgilandi lona liyazama ngoba sijwayele ukubabukela kodwa hayi izinga lakhona akusilo njalo angiboni ukuthi bengaphakamisa inkezo.

“Abafowethu abaseAfrica bayazama yebo kodwa inkinga yikuthi amadoda aphetsheya lawana izinga lawo liphezulu kakhulu. Siyazama ukuba siyeqayeqe labo kodwa kunzima. Iqembu leGhana njengoba lizadibana leleUruguay siyacela sibili ukuba likhwitshize okwalowayamnyaka lapho abasikhupha sesithembile ukuba lapha sesingenile.”

Iqembu leArgentina lithuthukise amathuba alo awokudlulela kusigaba esilandelayo esomncintiswano ngokunqoba elikwenze eleMexico nge 2 ka nya kodwa belike lethusa abalandeli balo ngokunqotshwa elikwenziwe ngele Saudi Arabia. Owadlalela iqembu lesizwe elamajaha aleminyaka elitshumi lanhlanu, uMncedisi Gumede, uthi amaqembu okwakuthiwa mancane kawasesabi amakhulu.

“Abasayesabi, sekulabadlali abatsha abangayesabi amabizo amakhulu aboRonaldo labanye. Yikho nxa bedlala vele bayazidlalela, kabakhangeli ukuthi lowu ngubani njalo lokhu kwenza kube nzima ukuthi labana bedle amaqembu amancane. Sekufanana.”

Loba kunjalo, amaqembu amele izwekazi laseAfrica wona inengi lawo adonse nzima kumidlalo yakuqala. Umqeqetshi osebenza labasakhulayo, uKhotso Nyathi, uthi isimo somnotho samazwe ezwekazi leAfrica laso sidala ukuba amaqembu lawa engaqhubi kuhle.

“Thina uhlupho lwethu mhlawumbe lungaba ludalwa yibuyanga ngoba kuyahambelana ubuyanga lendlela iqembu elidlala ngayo. Ibhola lihamba kuhle nxa abadlali bedonsa kanye kanye yikho ungathola sekulabanye abenza abakufunayo bengenzi okufunwa ngumqeqetshi akubi lempumela enhle. Umuntu nxa esezibona yena eselemali kubanzima ukuba abuye ezoqeqetshwa ngumuntu ambona angani akalamali ngoba usuka adelele njalo khonokho kuyasibulala kakhulu.”

ULizwe Sweswe, umqeqetshi osebenzele amaqembu abalisa eleTsholotsho, eleFC Platinum kanye leleTalen Vision, uthi impumela yemidlalo esidlaliwe iveza ukuba izinga lomdlalo wenguqu odlalwa kwele Qatar liphezulu kakhulu.

“Lonyaka ngibona angani izinga lemidlalo lihle kakhulu ngoba siyawabona amaqembu amancane esenza izimanga ngokunqoba amaqembu amakhulu. Lokhu kutsho ukuba abantu bamazwe atshiyeneyo benza umsebenzi omuhle kakhulu ekuthuthukiseni umdlalo wenguqu njalo sekumangalisa abantu inkezo iphakamiswa ngelinye ilizwe abantu abakade bengalikhangelelanga.

“Lokhu kuzakwenza wona amaqembu abekhangelelwe ngabanengi akhuphule amasokisi njalo lokhu kuzakwenza sibone imidlalo eyehlukene kuleminyaka eyedlulayo.”

Umdlalo odlalwe namhla phakathi kweqembu leCosta Rica leleJapan ube yisibonelo esokuba imidlalo yalonyaka itshayisa ababhejayo ngamakhanda njengoba eleCosta Rica linqobe eleJapan nge 1 ka nya.

Kumidlalo yawo yakuqala lawa maqembu eleJapan linqobe eleGermany nge 2 ka 1 kuthi eleCosta Rica libhaxabulwe nge 7 ka nya ngeleSpain okokuthi inengi labalandeli bomdlalo wenguqu belicabangela ukuthi eleJapan yilo elizanqoba.

Facebook Forum

XS
SM
MD
LG