WASHINGTON DC - Inhlanganiso emela odokotela eyeZimbabwe Hospital Doctors Association ithi umumo usufike kuzinga elethusayo esibhedlela seParirenyatwa, eHarare, ngenxa yokusilela kwezinto zokulaphisa izigulane ezigoqela amaphilisi, igazi, amanzi kanye lemitshina, yona ehlala ifile.
Linhlanganiso iveze lokhu kuncwadi yezikhalazo eyilobele umqondisi wesibhedlela lesi izolo icela ukuhlangana laye ukuze baxoxisaze ngaloludaba.
Ukuma manzonzo komumo wesibhedlela lesi kuza ngesikhathi inengi lithukuthele phezu kwenyathelo likahulumende elokupha abaphathintambo bakhe, ama-ministers, lamalunga ephalamende izigidi lezigidi zamadola asemelika.
Amalunga ephalamende awamabandla womathathu athi aweZanu PF, CCC leMDC-T, aphiwe inkulungwane ezingamatshumi amane, US$40.000, ilunga ngalinye kwathi abaphathintambo baphiwa ingxenye yesigidi, US$500,000 umuntu ngamunye.
Inengi lithi le yimali edlalisiweyo ebimele isebenze ezibhedlela.
