WASHINGTON DC - Uzulu seveze ukukhathazeka ngokwanda kwabasakhulayo abahlaselwa ngumkhuhlane wengqondo ngenxa yokusebenzisa izidakamizwa.
Iziphathamandla zeIngutsheni, koBulawayo, zitshele iphephandaba leNewsDay ukuthi liyanda inani labatsha abaphethwe yilumkhuhlane abadinga ukwelatshwa kulesisibhedlela.
Udubo lokusetshenziswa kwezidakamizwa solubhahe kakhulu eZimbabwe lapho abasakhulayo abenza khona amagigi ngudlu benathe njalo bebhema okudakayo okugoqela i-cocaine.
Umkhuba lo ucina ugxila kwabanye baphenduke babe yizigqili zezidakamizwa. Zinengi inhlelo eziqhutshwa zinhlanganiso ezizimeleyo kanye lohulumende ngenjongo yokuqeda loludubo.
Ngempelasonto ukhansila kaWard 26 eEmganwini, koBulawayo, uMnu Mpumelelo Moyo uqoqe umdlalo wenguqu ngenjongo yokukhuthaza abasakhulayo ukuthi batshiyane lezidakamizwa njalo babhalisele ukuvota ngobunengi kukhetho lomnyaka ozayo.
UMoyo utshele umsakazo weStudio 7 ukuthi abantu kumele babambe iqhaza balwisane lodaba lwezidakamizwa ngoba soluphambanisa abasakhulayo.
