WASHINGTON DC - Inhlanganiso elwela amalungelo oluntu emhlabeni jikelele eyeHuman Rights Watch (HRW) ithi ukwephulwa kwamalungelo nguhulumende weZimbabwe ngomnyaka osanda kwedlula kuqhele kwafika kuzinga elesabekayo.
Kugwalo elwethule namuhla oluveza isimo samalungelo emazweni omhlaba ngo2022, inhlanganiso le ithe uhulumende wethule imithetho emibi kakhulu ngenjongo yokuthathela abantu amalungelo abo.
Imithetho le igoqela oweCyber and Data Protection Act kanye lowePrivate Voluntary Organizations Act.
I-Human Rights Watch ithi njalo abantu abasola umbuso weZanu PF bebebotshwa nje mahlayana nyakenye, kanti njalo ithi abezomvikela abayibo abasetshenziswa ukuhlukuluza uzulu esikhathini esinengi ababotshwa.
Ugwalo lolu luza lapho uzulu weZimbabwe ethukuthele phezu kokutshaywa kwamalunga eCCC ngabantu abanakanelwa ukuthi ngabasekeli beZanu PF eMurehwa North.
Iziphathamandla zikahulumende ezibalisa umphathintambo obona ngokwethulwa kwemibiko uNkosikazi Monica Mutswangwa lomphathintambo wezemithetho uMnu Ziyambi Ziyambi abaphendulanga imibuzo esibathumele yona ngaloludaba.
Kodwa bahlezi bekulandula ukuthi uhulumende wephula amalungelo kazulu.
Lanxa kunjalo, ingcwethi kwezombusazwe uDr. Jethro Mpofu utshele iStudio 7 ukuthi ngempela bugcwele ubufakazo bokwephulwa kwamalungelo oluntu nguhulumende kaMongameli Emmerson Mnangagwa.
