WASHINGTON DC - Impumela yophenyo olwenizwe yinhlanganiso yeMo Ibrahim Foundation iveza ukuthi eleZimbabwe ngelinye lamazwe asezwekazi leAfrica aqhubeka esephula amalungelo oluntu.
Uphenyo lolu lukhangela okwenzakal emazweni eAfrica kusukela 2019 kusiya ku2021.
Amanye amazwe akusibaya sinye leZimbabwe lapho ukwephulwa kwamalungelo oluntu okuqhubeka kusiba kubi ngamandla agoqela eleUganda, Algeria, Togo, Senegal, Rwanda lamanye atshiyeneyo.
Kodwa loluphenyo luthi isimo sezenotho siyathuthuka eZimbabwe kanye lesomvikela ndawonye lokuhlonitshwa kwemithetho yelizwe nguhulumende.
Loluphenyo luthi njalo uhulumende weZimbabwe useqhuba umsebenzi ngendlela ecacayo, i-transparency and accountability, kulandela ukugenqulwa kukaMnu Robert Mugabe embusweni libutho ngo2017.
Kundlela uhulumende kaMongameli Emmerson Mnangagwa abusa ngayo, uphenyo lolu luthi eleZimbabwe lihlezi kuzinga lamatshumi amabili lasitshiyagalolunye, 29, phakathi kwamazwe wonke aseAfrica angamatshumi amahlanu lane, 54, njalo ithi umbuso omuhle uya ugugudeka eZimbabwe.
