WASHINGTON DC - UMongameli wakweleBelarus, uMnu Alexander Lukashenko, ugqibe uhambo lwakhe lwensuku ezintathu eZimbabwe namuhla ngokwethekelela eVictoria Falls ukuyabuka amahlathi eVictoria Falls Rain Forest kanye lenyamazana ehamba loMongameli Emmerson Mnangagwa.
Le kukhanya kuyindlela yeZimbabwe yokuzama ukuthuthukisa iVictoria Falls, okungenye yezindawo zemvelo ezidume kakhulu emhlabeni ezithakazelelwa yizethekeli.
Esuka lapho uLukashenko ubuyelile elizweni lakhe.
ULukashenko loMnangagwa basayinelane izivumelwano ezingena kuzigidi ezedlula amatshumi ayisithupha, $66 million ngolwesibili ngenjongo yokuqinisa ubudlelwano phakathi kwamazwe abo kunhlangothi ezigoqela ezamabhizimusi lezokulima.
EleBelarus lithi phakathi kwalonyaka lomnyaka ozayo lizaphathisa eleZimbabwe ngamathalakitha okulima aphezu kwenkulungwane ezintathu, 3,500 lezinye inhlelo ezizathuthukisa umnotho weZimbabwe.
Abebandla leZanu PF bathi kunengi okuzatholwa yeZimbabwe kweleBelarus, kodwa abebandla eliphikisayo eleCCC bathi akulalutho oluhle oluzaphuma lapha ngoba uLukashenko ungumuntu omubi owetheswa umlandu wokubusa ilizwe lakhe kubi njengoMnangagwa.
"Okwenziwa nguMnangagwa loLukashenko... akulalutho oluzaphuma, ilizwe lakhe leBelarus yi-third world country [ilizwe elisaththukayo] njengeZimbabwe... Yikudlala ngesikhathi, kufana lokuthi uhlanganise u-zero lo-zero. Impumela ngu-zero," kutsho ilunga leCCC uMnu Abednico Bhebhe.
Kodwa ilunga leZanu PF uMnu Malaki Nkomo uphikisane lamazwi kaBhebhe esithi, "Angiboni ukuthi kulomuntu osengasukuma asole imizamo enjalo. bonabo abasolayo bayabe besiithi kwenziweni?"
"Sibona lokhu kuphumelela kuyangisa labo abasolayo. Thina uMongameli wethu ukhuluma esenza," uqhebeke esitsho uMnu Nkomo kungxoxo ayenze leStudio 7.
Facebook Forum