WASHINGTON DC - UMongameli Emmerson Mnangagwa sekhuthaze izizalwane zeZimbabwe ezikweleSouth Africa ezifisa ukuphindela ekhaya ukuthi ziphenduke ngoba esithi umnotho welizwe usuthuthuka.
UMnangagwa wethule amazwi la emkhosini wokunanza usuku lwabasakhulayo, olweRobert Mugabe National Youth Day, oqhutshelwe eLupane ngoLwesibili.
Amazwi kaMnangagwa aza ngesikhathi inkulungwane zezizalwane zeZimbabwe ezikweleSouth Africa zilungiselela ukuphindela ekhaya ngoba amaphepha azo, kumbe ama-permits, ezaphelelwa yisikhathi ngoNhlangula.
UMnangagwa uthe njalo inhlelo zemisebenzi esezisungulwe nguhulumende wakhe zenza kungabi lesidingo sokuthi izizalwane zeZimbabwe ziqhubeke zisiyadinga imisebenzi eGoli.
“Inhlelo zomnotho esizenzayo zitsho ukuthi akusoze kube lesidingo sokuthi abantsha baye eGoli ukuyadinga imisebenzi,” kutsho uMnangagwa.
“Ngithanda ukulazisa ukuthi uhulumende wami uzimisela ukwamukela izizalwane zeZimbabwe eziseSouth Africa. Buyani ekhaya ilizwe liyathuthuka. Buyani ekhaya lizevula amabhizimusi. Sizimisele ukulamukela lonke.”
Ukuhlaziya loludaba sixoxe lesikhulumeli senhlanganiso yeZimbabwe Community in South Africa uMnu Bongani Mkhwananzi yena othi abukho ubufakazi bokuthi umnotho weZimbabwe uyathuthuka.
“Okwemisebenzi khona ngokwakho, angikuboni kulemisebenzi,” kutsho uMnangagwa. Ukuthi athi yena umnotho usulunga khona kule-high unemployment, akula qiniso lokho.”
Facebook Forum