WASHINGTON DC - Amapholisa akweleSouth Africa athi kulezigebengu ezihlasele imota yawo ngemibhobho eLouis Trichardt, duzane lomngcele weBeitbridge izolo zakhulula abasolwa baseZimbabwe abayisithupha ababotshelwe amacala agoqela awokugqekeza, awokuzama ukubulala kanye lawokugcina izikhali ngaphandle komthetho.
AbeZimbabwe laba babalisa uForward Shumba oleminyaka yokuzalwa engamatshumi amabili lasithupha, 26, uShingirai Nyandome, 32, uBrilliant Sibanda, 26, uErick Sithole, 35, uMoses Zambara, 32, kanye loAlex Nkomo, 35.
UZambara yena ubhekane lecala lokweba intambo zamandla kagetsi.
Amapholisa athi aphakathi kokudinga abantu laba njalo athi abalomkhondo wabo kumele bawatshayele ucingo.
“Amapholisa aseMakhado aphakathi kokuthungatha iqembu labasolwa ekade behlome ngemibhobho abahlasele badubula amapholisa abethwele izibotshwa eziyisithupha azikhulula namhlanje ekuseni,” kutsho isikhulumeli samapholisa eLimpopo, uBrigadier Motlafela Mojapelo, kumbiko awethulele intathelizindaba.
“Ngemva kwalokho, abasolwa bathethe izibotshwa eziyisithupha babaleka lazo behamba ngemoto yohlobo lweMercedes Benz leToyota Bakkie emhlophe.”
