WASHINGTON DC - UMongameli Emmerson Mnangagwa ufike kweleBhilithani ngoLwesihlanu ekuseni elanda umkhosi wokugcotshwa kwenkosi yakulelolizwe uKing Charles III ngoMgqibelo.
Uhambo lolu luza ngesikhathi ezinye izizalwane zeZimbabwe ezihlala eBhilithani ziqoqa ukutshengisela phezu kohambo lolu ngoba zisithi uMnangagwa ngumbusi omubi kakhulu obengamelanga anxuswe kulumkhosi.
Kodwa ukutshengisela lokhu kulakho ukungaphumeleli ngoba uhulumende weBhilithani ethule umthetho ovimba ukutshengisela ngesikhathi sokugcotshwa kukaKing Charles.
UMnangagwa uhlangane lowake waba yinhloko kahulumende wakweleBhilithani uMnu Tony Blair njalo ihofisi yakhe ithi bebekhuluma ngokuvuselela ubudlelwano phakathi kweZimbabwe lamazwe angetshonalanga, ikakhulu yona iBhilithani leMelika.
UMnangagwa uhlangane njalo lomphathintambo obona ngobudlelwano baseBhilithani lamanye amazwe uMnu Andrew Mitchel labosomabhizimusi ezama ukubahuga ukuthi bazevula amabhizimusi eZimbabwe.
Isiphathamandla sebandla leCCC eBhilithani uNkosazana Barbara Gwangwara, utshele iStudio 7 ukuthi uMnangagwa ubengamelanga anxuswe kulumkhosi.
Kodwa ilunga leZanu PF uMnu Believe Gaule, uthe labo abasola ukunxuswa kukaMnangagwa kumele bakhulume lohulumende weBhilithani onguye omnxusileyo.
