WASHINGTON DC - Uhlangothi lweUnited Nations olubona ngezamalungelo oluntu olweUN Human Rights Council ngoLwesine lukhuthaze amazwe alekhono ukuthi akhulumisane lamacele womabili ebutho lakweleSudan alwisanayo ukuze abeke izikhali phansi akhumisane umlotha.
Impi le iqale ngenyanga edluleyo njalo isibulalise abantu abangamakhulu ayisithupha, 600.
Inkuthazo le yethulwe ngumkhokheli wogatsha lolu uMnu Volker Turk emhlanganweni oqhutshelwe eGeneva kweleSwitzerland ngenjongo yokukhulumisana ngaloludaba.
UMnu Turk uthe bayakusola kakhulu ukubulawa kwabantu mahlanyana zinhlangothi zebutho ezilwisanayo, olukhokhelwa nguGeneral Abdel Fattah al-Burhan lohlangotho olukhokhelwa nguGeneral Mohammed Hamdan Dagalo.
Abameli bababili laba bakweleSaudi Arabia sikhuluma-nje kungxoxo sokuzama ukuqeda limpi. IUN Human Rights Council iyisolile kahulu limpi yakhuthaza ababili laba ukuthi bakhumisane umlotha.
Okhulume emele amazwe aseAfrica emhlanganweni lo uAllou Lambert oyisizalwane saseCote d’Ivoire uthe kubalulekile ukuthi amazwe aseAfrica abaphe iqhaza emizameni yokuletha ukuthula kweleSudan.
Umkhokheli wenhlanganiso elwela amalungelo oluntu eyeIbhetshu Likazulu uMnu Mbuso Fuzwayo utshele iStudio 7 ukuthi kuyadingeka ukuthi amazwe wonke alekhono angenele emizameni yokuletha ukuthula kweleSudan ngoba abantu bakulelolizwe sebethwele nzima ngalimpi.
