Intombazana esakhulayo, u Benu Mabhena, uthole isikhundla kumfanekiso omkhulu othiwa Blood Diamond, osatshengisa kumabhayisikopo eMelika, njalo olabadlali abalo dumo abagoqela u Leornado Dicaprio, owadlala ku Titanic, lo Jennifer Connelly, yena uBenu edlala eyisiphepheli, engunkosikazi ka Djimon Hounsou, olodumo kwezomfanekiso.
Empilweni yoqobo, uBenu yindodokazi kaMnumzana Richard Mabhena owayengumncedisi ka Dr Joshua Nkomo, otshele iStudio 7 ukuthi wabaleka kweleZimbabwe ngesikhathi se Gukurahundi, uBenu eleminyaka emine, esetheswa icala lokuthi wancedisa uNkomo ukubaleka ephuma emngceleni weleBotswana ngesikhathi seGukurahundi.
UBenu, utshele uSithandekile Mhlanga weStudio7 ukuthi ukuhlala kwakhe njengesiphepheli kwele Botswana, le Lesotho kanye lele Melika kwenza enelise ukudlala kuhle kulo umfanekiso.