Sokuyisikhathi sezulu nje, umkhuhlane woqhuqho owe Malaria ubikwa usuhlasela izigaba zelizwe ezivame ukuba lalolu hlupho ngalesi sikhathi somnyaka ezigoqela ezitholakala eZambezi Valley, esigabeni seMandebeleni, iChiredzi, kanye le Nkabazwe.
Uhulumende ubikwa esithi useqalisile uhlelo lokufafaza imithi yokubulala imiyane emizini yonke eHwange njalo uzafafaza yonke esesigabeni sangenyakatho yeMandebeleni ngoba kuyiso isigaba esihlaselwa kakhulu ngumkhuhlane woqhuqho elizweni.
Kodwa omela iHwange East edaleni lephalamende, uMnumzana Thembinkosi Sibindi utshele uSithandekile Mhlanga oweStudio 7 ukuthi abantu bathola usizo lwama mbule ama mosquitoe net enhlanganisweni ezizimeleyo njalo usizo oluvela kuhulumende bengaluthakazelela kodwa abakaluboni.
USithandekile Mhlanga uphinde waxoxa lesiphathamandla se Zanu PF esiyisakhamuzi eJambezi eHwange, esingathandanga ukuqanjwa ngebizo sisithi sikhulumanje siyagula sibulawa ngumkhuhlane woqhuqho njalo sokungcwatshwe ihlekana labantu esigabeni sakhe ngomkhuhlane lo, kungalasizo abalutholayo