Amalunga enhlanganiso edinga ukulotshwa kutsha kwesisekelo sombuso, iNational Constitutional Assembly, abotshiwe amanye abhaxabulwa kabuhlungu ngamapholisa ekutshengiseleni okwenziwe eHarare lamuhlanje.
INCA itshengisele isithi kayifuni ukumanyaniswa kokhetho njalo ifuna isisekelo sombuso esitsha. Amalunga alinhlanganiso angene esitaladeni ehlabela ethwele amabhakani alotshwe ukuthi uzulu sekhathele ngokuphathwa luklubhu nguhlumende njalo eqilibizela kukhetho.
Abantu laba, basuke emgwaqweni, uChinhoyi bathi sebelubhekise edaleni lephalamende amapholisa akade ehlome ngezamboko ahle abasukela abatshaya adobha abedlula amatshumi amabili. Elinye ilunga leNCA libikwa litshaywe kabuhlungu laze lasiwa esibhedlela se Avenues Clinic.
Kunjalo nje, ingcwethi ecubungula ezombusazwe ithi akusensuku zatshwala uzulu weZimbabwe engangenanga ezitaladeni watshengisela ngendlela engakaze ibonakale elizweni. Umnumzana Qhubani Moyo, ongumqondisi weBulawayo Dialogue utshele uChris Gande weStudio 7 ukuthi indlela umumo wenotho yelizwe obhidlika ngayo uzabangela ukuthi wonke umuntu asukumele phezulu ikilogo ingakhala.