Ngesikhathi uzulu ekhala ngokucitshelwa ugetsi okungapheliyo, eleNamibia selivume ukuncedisa eleZimbabwe ngezigidi le zigidi zamadola eMelika ukuthi lilungisise isititshi se Hwange Thermal Power Station ukwengezelela amandla kagetsi ewaletha elizweni.
Umongameli uMugabe, ekhatshwe ngezinye iziphathamandla zikahulumende, wethekelele eleNamibia lapho emukelwe ngentokozo nguhulumende walelolizwe njalo laye ube khona lapho kulotshwa isivumelwano sokuletha ugetsi lesi. UMongameli Hifikepunye Pohamba walelolizwe laye ube khona.
Ingcwethi ecubungula ezombusazwe, uMnumzana Joshua Mhambi utshele uSithandekile Mhlanga weStudio 7 ukuthi okusolisayo yikuthi ilizwe kalilamali yokubhadala izikwelede, kodwa kuhle nxa isivumelwano lesi singasebenza, ngoba udaba lokuswelakala kukagetsi ludanisa.