amalinks wokungena

Breaking News

Amapholisa Alwisana Kanzima Labasekeli Belinye Lamacele E MDC


Icele le MDC elikhokhelwa ngu Mnumzana Morgan Tsvangirai lithi laloba livinjwe ngamapholisa ukwenza umhlangano walo emzini we Budiriro e Harare ngempelasonto abasekeli balo bachithizwa ngamapholisa, adubula emoyeni , abachela ngenthuthu ehitshayo i tear gas, alibuyeli emuva ekuqhubeni imisebenzi lenjongo yebandla.

Isikhulumi salelibandla u Mnumzana Nelson Chamisa utshele i Studio 7 ukuthi amapholisa yiwo aqalisa umsindo etshaya abantu mahlayana kodwa amanye lawo atshaywa kakubi ngabantu akadebeze emhlanganweni lo ongasabanga khona.

Laloba u Chamisa ethe bekulabantu abanengi akade beze kulo umhlangano abanye ababone ingxabangxoza le isenzakala bathi abantu akade bekhona ngabasakhulayo becele lika Tsvangirai kuphela abayibo abaqalise umsindo bevala imigwaqo ngamatshe okucunule amapholisa.

U Chamisa uthi laloba amapholisa esevimbe imihlangano yama rally e Harare le Chitungwiza icele lakhe lizaqhubekela phambili ngemihlangano yalo ngoba sokuyisikhathi sokutshengisa uhulumende we ZANU PF ukuthi abantu be Zimbabwe sebediniwe. Kodwa icele leli lenelise ukwenza ama rally ngempelasonto ko Makoni e Manicaland, lako Murehwa. U Chamisa uthi baphakathi kokuqoqa ukutshengisela kukazulu okuzazunguza uhulumende kodwa kathandanga ukutsho ukuthi ukutshengisela lokhu kuzakuba khona nini.

Kunjalo nje komishina wamapholisa u Augustine Chihuri ubikwa esebize amapholisa wonke abekukhefu ukuthi aphindele emsebenzini ngoba izinto zilakho ukuma mazonzo elizweni abamabandla aphikisayo lezinye inhlanganiso beqoqa ukutshengisela.

Kodwa u Mnumzana Abednico Bhebhe umsekeli wesikhulumi secele le MDC elikhokhelwa nguMnumzana Arthur Mutambara uthi ukutshengisela okukhona kuqoqwe ngabantu be Zimbabwe asebediniwe ngombuso ka Mongameli Robert Mugabe, le ZANU PF yakhe. U Bhebhe uthi uhulumende usesenza imizamo yonke ayenelisayo yokuncindezela izizalwane ze Zimbabwe angafuni ukuthi zisukume zitshengisela ukusola kwazo umumo oselizweni.

Ezinye Indaba Ze Studio7..

XS
SM
MD
LG