Kufe abantu abangamatshumi amathathu lanhlanu abane balimala kakubi engozini yokungqikilana kwebhasi ebithwele abantu lesitimela eyenzakale lamuhla ekuseni emzini we Dzivarasekwa eHarare.
Libhasi ibikwa ibithwele abantu, inengi labo lingabayathenga izinto zokuthengisa emkhambo we Mbare, labakade besiya emsebenzini.
Abalimeleyo basiwe esibhedlela se Parirenyatwa, njalo amapholisa akhuthaza abantu ukuthi baze khangela izidumbu bedinge izihlobo zabo.
Amapholisa abikwa esola umtshayeli webhasi le ohle wafela engozinile, esithi kananzelelanga ukuthi isitimela lesi besiseduze, wehluleka lokuzwa impembe yaso.
Umthetho vele uthi kumele ibhasi eyabithwele abantu ime lapho okuhlangana khona umgwaqo lenjanji. Kodwa izakhamizi zalindawo zithi amalayithi atshengisa ukuthi kulesitimela esizayo kawasebenzi, njalo utshani kaluqunywa.
Kayiso ngozi yakuqala ukwenzakala kulindawo.
Ibandla le MDC elikhokhelwa nguMnu. Arthur Mutambara selethule umbiko wokusola uhulumende ngoba engalungisi imigwaqo lenjanji yezitimela elizweni.
Kunjalo nje, umgcinisihlalo we nhlanganiso ye Dzivarasekwa District Development, uMnu Trinos Mgutshini utshele uSithandekile Mhlanga weStudio 7 ukuthi umumo oseDzivarasekwa lamuhla uzwisa usizi ngoba kwezinye indawo kulezililo emizini ilandelana. Uthi njalo inhlanganiso yakhe yenza imizamo yokuphathisa imuli ezifelweyo.