Inhlanganiso elwela amalungelo abesifazane iWOZA ithi amalunga ayo eHarare le Gweru atshaywe ahlukuluzwa kabuhlungu ngamapholisa ebuzisiswa ngobudlelwano bawo le bandla le MDC elikhokhelwa nguMnumzana Morgan Tsvangirai.
Amalunga alinhlanganiso amabili abikwa esesibhedlela eselatshwa izilonda azithola ngemva kokutshaywa ngamapholisa.
Lokhu kwenzakala amalunga e WOZA edlula amatshumi amathathu asanda kubotshwa etshengisela eGweru ezakuma phambi ko mthethwandaba kusasa.
Isiphathamandla sale inhlanganiso, uNkosazana Nolwandle Simunyu utshele uSithandekile Mhlanga weStudio 7 ukuthi udaba lokuhlukuluzwa kwamalunga la seluse zandleni zamagqwetha njalo uchasise okwehlele amalunga enhlanganiso yakhe kungxoxo ayenze le studio 7.
Kunjalo nje, iWOZA isibumbe uhlangothi lwayo kwele South Africa njalo inkokheli zayo zithi iZimbabwe ekhululekileyo izatholakala kuphela nxa amahlabezulu esekhiphe ukwesaba wonke kwasala isibindi.
Ekhuluma lexuku labantu abedlula ikhulu abagoqela amanina akwele South Africa avela emabandleni ezenkolo atshiyeneyo, umkhokheli we WOZA uNkosikazi Jenni Williams, uthi sekudingeka amaZimbabwe ame isibindi ngoba kukhanya khona kuzachitheka igazi elinengi, kungakatholakali umbuso okhululekileyo. UBennedict Nhlapho usipha loludaba ngokugcweleyo.