Owayengukhansila wemzini weGlen View eHarare njalo elilunga leMDC, uMnumzana Last Mayengahama uthunjwe ngabantu abangaziwayo emini lamuhla eBorrowdale ngemva kwesikhumbuzo sikamuyi uMnumzana Gift Tandare.
Sikhuluma nje, akwaziwa ukuthi ungaphi. Unobhala wabasakhulayo eHarare District, uMnumzana Robert Manyengavana utshele iStudio 7 ukuthi ubesemoteni loMnumzana Manyengavana kwasekusiza amadoda amahlanu akade ehlome ngemibhobho athumba uMayengahama obengumngane kaTandare amfaka emoteni abaleka laye.
Kunjalo nje, abantu abanengi babuthene emthandazweni wesikhumbuzo sikaTandare oqoqwe ngumanyano we Save Zimbabwe Campaign emzini weBorrowdale eHarare. Abantu abambalwa abagoqela abakhokheli becele leMDC elikhokhelwa nguMnumzana Morgan Tsvangirai babotshwe batshaywa kakubi ngamapholisa embuthanweni we Save Zimbabwe Campaign emzini weHighfield.
Abakade bekhona embuthanweni walamhlanje bagoqela umka muyi labantwana, abameli bakwamanye amazwe, inkokheli zamabandla aphikisayo, abezinkonzo labezinye inhlanganiso.
Omunye obekhona embuthanweni walamuhla nguMnumzana Reggie Moyo olilunga lecele leMDC leli njalo engumgcinisihlalo wenhlanganiso edinga isisekelo sombuso esitsha, iNCA, koBulawayo oxoxe lo Chris Gande weStudio 7 ngokwenzakale lamuhla.