Amapholisa abikwa ethethe amalunga ecele le MDC elikhokhekhelwa ngu Mnumzana Morgan Tsvangirai ngodlakela esibhedlela se Avenues ababuyisela esitokisini, ngomgqibelo phakathi kobusuku. Abayisitshiyagalolunye laba bagoqela umeli we Glenview kudale lepalamende u Mnumzana Paul Madzore, umcebisi ka Tsvangirai u Mnumzana Ian Makone labanye.
Ababotshiweyo laba bamiswe phambi komthethwandaba ngomgqibelo lapha idale elibanike imvumo yokuthi bayekwelatshwa, basebesiwa e Avenues Clinic. Igqwetha lababotshiweyo laba u Mnumzana Alec Muchadehama utshele i Studio 7 ukuthi abantu laba basiwe emthethwandaba njalo namhla, lapha abalelwe ukuthi bahlawuliswe imali yesibambiso. Betheswa icala lokuphosela amabhomba epetulo endaweni ezimbalwa elizweni. Umahluli walile ukuthi bahlawuliswe i bail esithi amapholisa asahluzisisa loludaba, njalo belakho ukuqhubeka besenza ubudlwangu dlwangu okutsho ukuthi ababotshiweyo laba bazahlala esitokisini okwamaviki amabili alandelayo. Kodwa u Muchedahama uthi bazakhweza loludaba emthethwandaba we high court kusasa.
Umsekeli kamgcinisihlalo wecele elikhokhelwa ngu Tsvangirai u Mnumzana Lovemore Moyo utshele u Brenda Moyo we Studio 7 ukuthi ukuhlukuluzwa kwamalunga abo akusoze kubuyisele muva umsebenzi webandla, wachasisa indlela ababotshiweyo laba abathethwe ngayo esibhedlela.