Isiphathamandla senhlanganiso yomanyano wezansi yezwekazi leAfrica iSADC, uMnumzana Tomaz Salomao oselizweni, ubikwa esehlangene loMangameli Mugabe njalo ezabonana lezinye iziphathamandla zikahulumende ezibona ngezemali, ngenhloso yokudingisisa ukuthi umnotho welizwe ungalungisiswa njani.
Lokhu kulandela umhlangano owenziwe yinkokheli yeSADC ngenyanga edluleyo, eleZimbabwe liyindaba egudwini, lapho okwanqunywe ukuthi ingxabangxoza eselizweni ilungiswe. Ingcwethi ecubungula ezombusazwe lezomnotho welizwe, uMnumzana George Mkhwananzi utshele uSithandekile Mhlanga weStudio 7 ukuthi uhambo luka Salomao luze nje ngoba kunengi okubangela ukubhidlika komnotho welizwe, angasoze akutshelwe yiziphathamandla zika hulumende, kodwa ngabalombono otshiyene lowakhe.