amalinks wokungena

Breaking News

Amagreen Bomber Abamba Ngamandla Abantu Ukuthi Baye Emkhosini Wokunanza Uzibuse


Abasakhulayo bebandla leZANU PF bencedisana lamapholisa kamanisipala weHarare abikwa ebambe ngamandla abantu ukuthi baye embuthanweni wonunanza ilanga likazibuse enkundleni yeRufaro Stadium.

Amapholisa kamanisipala abikwa evale imkambo yabantu esithi wonke umuntu kumele aye enkundleni yeRufaro. Kodwa ngokuya kwesikhathi amapolisa atshone egijimisana labantu phandle kwenkundla ye Rufaro, eHarare ngesikhathi uMongameli Robert Mugabe e phakathi embuthanweni wokunanza ilanga likazibuse.

UMark Peter Nthambe usethulela lolu daba. KoBulawayo umkhosi kazibuse ubunazwa enkundleni yeWhite City Stadium obekubikwa kugcwele abantu kodwa inengi labo lingabasakhulayo. Ukuze sizwe okunengi obekusenzakala kulelidolobha uChris Gande weStudio 7 uxoxe lentathelizindaba yethu uMasauso Banda.

Kunajalo nje, amacele omabili e MDC asole kakhulu amazwi kaMongameli Robert Mugabe embuthanweni wokunanza iminyaka engamatshumi amabili ilizwe lithole uzibuse enkundleni ye Rufaro. U Mugabe ubikwa ethuke iMDC esithi ifuna ukubangela ubudlwangu-dlwangu elizweni wathi uhulumende kasoze athandabuze ukubopha bonke abafuna ukuqala umvukela bephazamisa ukuthula.

Njengenhlalayenza akazange atshiyane lomkhuba wokuthuka ohulumende beBhilithane leMelika esithi uMnu Tony Blair inhloko kahulumende weBhilithane ufuna ukumsusa esikhundleni. Isikhulumi secele elikhokhelwa nguMnumzana Morgan Tsvangirai uMnumzana Nelson Chamisa uthi uMugabe uzibona angani nguye yedwa owalwela inkululeko yelizwe. Uthi njalo inkulumo yokuthi ibandla lakhe lifuna ukuvusa umvukela elizweni itshengisa ukuthi uselahleka umqondo.

Isikhulumi secele elikhokhelwa nguMnumzana Arthur Mutambara uMnumzana Abednico Bhebhe uvumelana lo Chamisa. Ingcwethi kwezombusazwe uMnumzana Jethro Mpofu, utshele uBrenda Moyo weStudio 7 ukuthi inhlamba ka Mugabe yokuthi uMnumzana Tsvangirai yisithunywa sabamhlophe bakwamanye amazwe, itshengisa ukwesaba ukusuka esikhundleni ngoba laye wanikwa lesisikhundla yibo abamhlophe laba akhuluma ngabo.

Kunjalo nje, izizalwane zeZimbabwe eziseBhilitane lamuhla zitshengisele zisola umbuso osekhaya zisithi ukujabulela ilanga likazibuse akuncedi ngalutho bona abantu bethwele nzima. Icele leMDC elikhokhelwa nguMnumzana Morgan Tsvangirai yilo ebeliqoqe loku kutshengisela. Lezi zizalwane ebezihlabela ingoma zenkululeko zilubhekise esigodlweni someli weSouth Africa eBhilitani zamupha izikhalazo zazo.

Usibalukhulu wecele leli eleMDC, uNkosazana Virginia Ncube, utshele uChris Gande weStudio 7 okunengi ngaloludaba.

Ezinye izindaba zeStudio 7 …

XS
SM
MD
LG