Obengunobhala wakoBulawayo kucele leMDC elikhokhelwa nguMnu. Arthur Mutambara, uMnumzana Albert Mhlanga usetshiye lelicele waya kuleli elikhokhelwa nguMnumzana Morgan Tsvangirai.
UMhlanga utshele umhlangano owenzwe lentathelizindaba ukuthi yena labanye abakade bekucele likaMutambara abafika amatshumi amathathu lanhlanu sebechaphele kwelinye icele.
UMhlanga uchasisele uChris Gande weStudio 7 izizatho ezibangele ukuthi athathe lelinyathelo.
Kunjalo nje, umsekeli wesikhulumi secele leMDC elikhokhelwa nguMnu. Arthur Mutambara, uMnumzana Abednico Bhebhe utshele uChris Gande ukuthi uMhlanga ubevele esesolwa ngabasekeli balelicele yikho ebone kungcono ukuthi ahle azisukele yedwa engakaxotshwa.