UMongameli Mugabe usesayine umthetho ocatshangelwa ukuthi uzaphathisa ukwehlisa isilinganiso sokonakala kwelizwe, iinflation lokwentengo yezinto ezitolo okuzenza iholo lezisebenzi lenelisa ukuziphilisa, owe National Incomes and Pricing Act.
Lumthetho ohlaziywe ngamadale eSenate lelephalamende uthi kumele kube lekomisheni ezahlolisisa ukukhwezwa mahlanyana kwezinto ezitolo ngosomabhizimusi. Likhomisheni izakhangela njalo iholo lezisebenzi lokuthi kumele likhwezwe ngesilinganiso esinganani kuqathaniswa lentengo yezinto.
Isikhulumi sikaMongameli Mugabe, uMnumzana George Charamba utshele intathelizindaba ukuthi amagama abantu abazakhethwa ukuba ngamakhomishena aseqhutshelwe umongameli mugabe.
Incwethi kwezenotho, uMnumzana Dan Ndlela utshele uChris Gande weStudio 7 ukuthi lumthetho kawusoze wenelise ukulungisisa ukubhidlika komnotho welizwe.