Kulamapholisa akoBulawayo asebuzisiswa ngodaba lokungethembeki esetheswa icala lokufumbathiswa ngabaninibhizimusi abalokhe bethengisa izinto ngentengo ephezulu ukuze engababophi. UBabongile Dlamini usipha loludaba. Kunjalo nje uhulumende ubikwa esethe usezathatha amankamapani amakhulu phansi kohlelo lwakhe lokwehlisa intengo yezinto ezitolo.
Osaphethe isikhundla sohlangothi olubona ngokwehliswa kwentengo, iCabinet Taskforce on Price Monitoring and Stabilisation, uMnumzana Elliot Manyika uthi amankampani azavala ngokungafuni ukulandela isingqumo sokwehlisa intengo azathathwa nguhlumende. Isikhulumi samapholisa, uMnumzana Oliver Mandipaka uthi sekubotshwe osobhizimusi abedlula amakhulu amabili labathengisa imali yakwamanye amazwe, osiphatheleni abedlula amatshumi amane phani kohlelo oseluphiwe igama lokuthi, Operation Dzikamai.
Omunye wabatholakale besephula isingqumo sikahulumende ngumsekeli wesikhulumi secele leMDC elikhokhelwa nguMnumzana Arthur Mutambara, uMnumzana Abednico Bhebhe. UBhebhe uchasisele uChris Gande weStudio 7 ngokwenzakeleyo. Ukwehliswa kwentengo ezitolo nguhulumende sekubangele ukusilela kwezinto ezimqoka empilweni kazulu elizweni jikelele okungakaze kubonakale ilizwe selilokhu lathola uzibuse.
Lokhu kwenzakala uzulu yena ubevele ethwele nzima ngokuqonga kwentengo ezitolo. Intathelizindaba yethu uMasautso Banda, ukhulume lezakhamizi zakoBulawayo esizwa ukuthi zithini ngempilo yazo esikhathini lesi osobunzima.