Amalungiselelo okunanza ilanga lamaqhawe alokhu eqhubeka njalo u hulumende ubikwa esithi usengezelele inani lamabhasi awenkampani ye Zupco okuthwala abantu abaya endaweni ezitshiyeneyo zelizwe ukuyananza ilanga leli. Inkampani ka loliwe layo ithi izakwengezelela izitimela emadolobheni kanye lesinye esizasuka e Harare sisiya eMutare.
Kunjalo nje, ibandla le MDC elikhokhelwa nguMnumzana Morgan Tsvangirai lithi uhulumende usesenza ilanga lokunanza amaqhawe angathi lilanga lokuthakazelela ibandla le Zanu PF. Ibandla lika Tsvangirai libikwa lethule olwalo uluhlu lwamabizo elithi ngawamaqhawe Kunjalo-nje isikhulumi sebandla le MDC elikhokhelwa ngumnumzana Arthur Mutambara, umnumzana Abednico Bhebhe laye uthi ibandla lakhe lisola indlela ibandla le Zanu PF ngokwenza engani amaqhawe ngababesekela ibandla le Zanu PF kuphela.
Kunjalo nje, umsekeli wokuqoqwa kwenhlelo kubandla le MDC elikhokhelwa ngumnumzana Tsvangirai, uMnumzana Morgan Komichi lelunga lalelibandla uMnumzana Dennis Murirwa baphumile ejele lamuhla. Ababili laba besebehlale isikhathi eside ejele. Ukomichi utshele istudio 7 ukuthi usebuhlungwini ngoba watshaywa ngamapholisa kakubi.