Inkokheli yamazwe womanyano wamazwe ezansi lezwekazi yeAfrica, iSADC, ethe gwaqa kweleZambia emhlanganweni we Ordinary Summit ibikwa iqakeze izandla kwakhala umpululu omangalisayo lamuhla lapho Umongameli Mugabe aze asukume.
Kubikwa bekulokuqakeza okuncinyane lapho kusukuma enye inkokheli kodwa kuthe sekusukuma umugabe kwavungama inkundla yonke. Lanxa abaphikisana lohulumende bebekhangelele ukuthi uMongameli Mugabe uzakhuzwa kusasa ngemva kokwethulwa kwembiko kaMongameli Thabo Mbeki owakhethwa yiSADCc ukuthi abe ngumlamlankunzi ukwamukelwa kukaMugabe kudelise inhliziyo zabo ngoba kutshengisele usekelo uMugabe alalo kunhlanganiso yesadc.
UMongameli Mugabe ubikwa ubehlezi eceleni likaMongameli Mbeki. Osekhethewe ukuba ngumgcinisihlalo weSADC, uMnumzana Levy Mwanawasa oweZambia evula lumhlangano ukhuthaze uzulu weZimbabwe ukuthi angalahli ithemba ngokonakala komnotho welizwe njalo angavuki ubhova.
Uzulu weZimbabwe kanye lomhlaba wonke jikelele ukhangelele ukuthi lumhlangano uphume lamacebo azacazulula udaba lwezimbabwe. UNkosazana Thokozani Khuphe umsekeli kaMnumzana Morgan Tsvangirai, umkhokheli wecele leMDC utshele uChris Gande weStudio 7 ukuthi sebephe inkokekheli yesadc imbono yabo yokufeza uhlelo oluzasusa izimbabwe ebunzimeni.
Kunjalo nje, mapholisa asebenza nsithi aweZambia lamuhla abophe uMnu Tapera Kapuya ongumhleli weNational Constitutional Assembly (NCA) kwele South Africa ngemva kokuba bemthole elebhakane ebelibhalwe izifiso zeNCA azokuthi kubelesisekelo sombuso esitsha eZimbabwe. uTapera udojwe ngamapholisa lawa eselusaka zambia duzane lalapho okuqhutshelwa khona umhlangano weSADC. Igqhwetha elimela uMnu Kapuya uMnu Arnold Tsunga utshele uNtungamili Nkomo oweStudio 7 ngocingo ukuthi amapholisa la athi ibhakane likaTapera leli lilakho ukutshotshozela.
Kusenjalo uNtungamili Nkomo ubelenxoxo njalo lengcwethi kwezombusazwe uMnu Qhubani Moyo ngezifiso zabantu beZimbabwe ngomhlagano weSADC. Umoyo, okhokhela njalo inhlanganiso yeBulawayo Dialogue uthi abantu beZimbabwe bafuna lumanyano ubambe uMugabe ngamandla ukuthi aguqule izenzo zakhe ezimbi.