Ekuqhubekeni kokukhalala umsebenzi okwenziwe ngamatitshala, ikakhulu abenhlanganiso yeProgressive Teachers’ Union kubikwa amatitshala amanye esethuselwa zinsoli zikahulumende.
Sikhuluma nje unobhala jikelele wePTUZ uMnumzana Raymond Majongwe usebalekile emzini wakhe wayacatsha ngemva kokudingwa ngamapholisa. Umgcinisihlalo wePTUZ eMasvingo, uMnumzana Munyaradzi Chauke ubikwa ebotshiwe ngamapholisa wakhululwa ngemva kokubuzisiswa ngamapholisa okwamahola ambalwa. KoBulawayo esinye isiphathamandla septuz, uMnumzana Enock Paradzayi utshele iStudio 7 ukuthi kulabantu abaze emahofisini ePTUZ bemdinga. Umgcinisihlalo wePTUZ koBulawayo, uMnumzana Vusa Mahlangu utshele uChris Gande weStudio 7 okwenzakalayo ngelanga lesithathu lokutshengisela.
Kunjalo nje, ukutshengisela kwamatitshala lokhu kuza inhlanganiso yezisebenzi, iZimbabwe Congress of Trade Unions isethule umbiko wokuthi amalunga ayo azakhalala umsebenzi mhlaka 18 lo 19 linyanga. Ingcwethi ecubungula ezombusazwe njalo engumgcinisihlalo wenhlanganiso edinga isisekelo sombuso esitsha, iNCA koBulawayo, uMnumzana Reggie Moyo uphe uChris Gande weStudio 7 imbono yakhe ngokutshengisela lokhu.