Umphathintambo obona ngezemali uMnumzana Samuel Mumbengegwi ekhuluma labamabhizimisi edolobheni le Masvingo, kuyonale iviki uvumile ukuthi uhlelo lukahulumende lokwehliswa kwentengo yezinto olusungulwe ekupheleni kwenyanga ka June aluqhutshwanga ngemfanelo.
Ingcwethi kwezomnotho lazo zihlezi zisola loluhlelo zisithi lubangele ukubhidlika komnotho ngamandla kwenza amabhizimisi amanengi avalwe izisebenzi ezinengi zamiswa umsebenzi. Lenhlanganiso yamagqwetha eye Law Society of Zimbabwe layo ithi uhlelo lolu lwaqhutshwa okungekho emethethweni.
Umnumzana Sam Ncube usomabhizimisi wako Bulawayo ongumqondisi wenhlanganiso ethuthukisa amabhizimisi abensendu i Affirmitive Action Group- AAG esigabeni seleMandebeleni, uthi uhulumende sokufuze athathe amanyathelo aqinileyo ukulungisisa ukuphambanisa akwenze ngokubamba ngamandla abamabhizimisi ukuthi behlise intengo yezinto, ezicine zingasatholakali ezitolo.