Inhlanganiso ekhankasela isisekelo sombuso esitsha elizweni iNational Constitutional Assembly, iNCA sidonsele umphathintambo obona ngezaphakathi kwelizwe uMnu Kembo Mohadi lamapholisa amane ngodaba lokutshaywa kwamalunga ayo ngamapholisa ephakathi kokutshengisela phezu odaba lwengxenye yesisekelo sombuso, uAmmendment Number 18. Igqwetha le NCA uMnu Andrew Makoni uthi iNCA ifuna uMohadi labanye bakhe bahlawule abantu laba imali engange $10 trillion.
Lokhu kuza ngemva kokuba linhlanganiso isithi kulelunga lalinhlanganiso, uNkosikazi Bronislawa Kwinjo obhubhe ngemva kwamanxeba athole ngokutshaywa ngamapholisa mhla betshengisela ngenyanga kaNtulikazi. Untungamili Nkomo uxoxe lesiphathamandla seNCA uMnu Felix Magalela Mafa othi abanengi babantu laba sebeyizigoga ngokutshaywa abakwenzwayo. Uthi kungehlula eZimbabwe bazakhweza udaba lolu e International Criminal Court of Justice eseGeneva.