Akwaziwa ukuthi kozala nkomoni emhlanganweni we National Executive Council ye cele le MDC elikhokhelwa nguMnu. Morgan Tsvangirai kusasa, kulandela ingxabangxoza yokuchithwa ko hlangothi lwabesifazane.
Obengumkhokheli waloluhlangothi, uNkosikazi Lucia Matibenga uthi uzakuya kulo umhlangano loba nje ngesisekelo salelibandla bekungamelanga aye ngoba engasengumkhokheli we Women’s Assembly.
UNkosikazi Theresa Makone osekhethwe ukuthi athathe isikhundla sika Matibenga, laye utshele istudio 7 ukuthi uzahamba kulumhlangano. Isiphathamandla salelicele, uMnu. Sam Siphepha Nkomo, utshele uSithandekile Mhlanga we studio 7 ukuthi ingxabangxoza esebandleni lakhe iyatholakala empilweni njalo ayiphazamisi ibandla lakhe ngoba lokhu liqine lithe saka.