Amalunga ecele leMDC elikhokhelwa nguMnumzana Morgan Tsvangirai koBulawayo abikwa ebotshiwe atshaywa kabuhlungu ngamapholisa ngemva kokuya emahofisini ephephandaba leChronicle efuna ukuyatshela abahleli ukuthi udaba olulotshwe ngabo lungamanga.
IChronicle ibilobe udaba lokuthi oMnumzana Dickson Mahommed lo Geshom Zimba bebephiwe imali ngumsekeli kamongameli walelicele, uNkosazana Thokozani Khuphe ukuze batshaye abantu abeze emhlanganweni wokukhetha uhlangothi lwamakhosikazi nganyanga edluleyo. Ababili laba babikwa bethethwe emahofisini eChronicle ngamapholisa alitshumi ehlome ngemibhobho bayavalelwa esitokisini esithelwe amanzi ukuze bangenelisi ukuhlala phansi.
Bathi njalo amapholisa akhiphe amalayithi esitokisi bahlala emnyameni okwamalanga ayisikhombisa betshaywa nsukuzonke. UChris Gande weStudio 7 ukhulume lomsekeli wesikhulumeli salelicele, uNkosazana Thabitha Khumalo ukuthi sizwe okunengi ngaloludaba.