Isidumbu sikamuyi uAdonis Musati, isiphepheli seZimbabwe esifele kudwendwe lokudinga amaphepha obuphepheli kweleSouth Africa kumaviki amathathu edluleyo sisiwa eZimbabwe lamuhla.
UMnu Braam Hanekom, isiphathamandla senhlanganiso ebiphatheke ngokuncedisa imuli kaMusati ukuthola imali yokuthwala isidumbu, i People Against Suppression, Suffering, Opression and Poverty utshele lumsakazo ukuthi isidumbu sikamuyi sizasuka lamuhla ngendizamtshina sisiya eZimbabwe ukuyangchwatshwa.
UMusati ubikwa ebulewe yindlala phandle kwenkamba yeziphepheli eCape Town ngoba ebeselesikhathi eside ehlala khonapho engadli, edinga incwadi ezobuphepheli ezisemthethweni.
Kusenjalo eleBhilithane lithi lokhu liqinisa isinqumo salo sokuthi izizalwane ze Zimbabwe ebezidinga ubuphepheli kulelolizwe kodwa zehluleka zibuyiselwe ekhaya. Isiphathamandla se nhlanganiso ebona ngamalungelo eziphepheli kwele United Kingdom, uNkosikazi Sarah Harland utshele iStudio 7 ukuthi amagqwetha azahlangana kusasa ukuthi enze isinqumo sokuthi alwisane lesigwebo lesi kumbe hatshi. Ukubuyiselwa kweziphepheli lezi bekumiswe okwesikhatshana kulindelwe impumela yokuthethwa kodaba lwesizalwane seZimbabwe esaziwa ngokuthi ngu ‘HS’, sona osokunqunywe ukuthi sibuyiselwe ekhaya.