Laloba umkhokheli welinye lamacele e MDC, uMnumzana Morgan Tsvangirai ehlezi esethusela ukuthi icele lakhe lizaphuma kunkululo ezikhokhelwa nguMongameli we South Africa uMnumzana Thabo Mbeki, namhla izikhulumi zalelibandla zitshele lumsakazo ukuthi icele leli kalisoze liphume enkulumeni. Ukwethusela kukaTsvangirai lokhu kusolwe kakhulu ngelinye icele leMDC likhokhelwa nguMnumzana Arthur Mutambara, lisithi ukuphuma enkulumeni esezivele seziphela kutshengisa ukufiphala kwengqondo kuka Tsvangirai labanye bakhe.
Konke lokhu kwenzakala sokuphuma imibiko yokuthi uTsvangirai usebenzelana labamhlophe bakwamanye amazwe ukuphazamisa inkulumo lezi. UNkosazana Thabitha Khumalo umsekeli wesikhulumi secele leli, uthi laloba kuyikuthi bayaphuma enkulumeni lezi, abasoze bakwenze bengaqalanga ngokukhulumisana lezinye inhlanganiso ababesebenzelana lazo, kanye labasekeli bebandla.