amalinks wokungena

Breaking News

Bayizigidi Ezintathu Abazafuna Uncedo Lokudla Kunyanga Ezithathu Ezizayo


Inhlanganiso epha uncedo lokudla kwabahlaselwe yindlala eye United Nations World Food Programme (WFP) ithi ikhangelele ukuncedisa izigidi ezintathu zabantu kunyanga ezintathu ezilandelayo ngoba udubo lwendlala luqhubekela phambili.

Ekhuluma leStudio 7 lamhlanje uMnu Richard Lee oyisikhulumi seWFP ezansi yeAfrican uveze ukuthi inhlanganiso yakhe ifuna izigidi ezedlula amatshumi amabili zamadollar emelika -US$21m ukuze yenelise ukuqhuba inhlelo zokunceda abalambayo ngokudla endaweni zonke zeZimbabwe.

Uthi balethemba lokuthi isivuno sizakuba sihle lonyaka ngoba isimo okwamanje sisibi okwamagama, abantu abanengi bethwele nzima ngendlala. UMnu Lee uveze ukuthi umnyaka osanda phela ubungumnyaka obulobunzima obuphindiweyo emulini ezinengi ikakhulu ezemaphandleni ezingatholanga lutho emasimini ngenxa yokungani kuhle kwezulu.

Sibelengxoxo lengchwethi ecubungula ezokulima njalo elilunga ledale lephalamende emela iMDC ekhokhelwa nguMnu Arthur Mutambara uMnu Edward Mkhosi othi yena akalathemba lokuthi umnyaka ka2008 uzabangchono ngoba abantu abanengi bengalimanga ngenxa yokuswelakala kwenhlanyelo lalobanje izulu likhanya lilinengi.

Ezinye Indaba ZeStudio 7...

XS
SM
MD
LG