UMongameli Thabo Mbeki weleSouth Africa ubikwa esuke kweleZimbabwe izolo elingise izandla ngoLwesine ngemva kokuba imizamo yakhe yokukhumisa umlotha uMongameli Mugabe lamacele womabili eMDC yehlule.
UMbeki ubikwa evalelane loMugabe okwamahola amane kodwa wala elokhu esemba phansi esisthi vele kasoze adlulisele phambili ilanga lokhetho kumbe ukwamukela isisekelo sombuso esitsha. UMugabe ubikwa etshele uMbeki ukuthi kumele iMDC iqale itshele amazwe ethula izijeziso zenotho ukuthi zesule lezi zijeziso kuqala andubana ahlale phansi lenkokheli yalamabandla.
Kodwa uMbeki ubikwa etshele intathelizindaba ukuthi inkulumo zakhe zihambe kuhle. Kodwa abazi okwenzakalayo batshele iStudio 7 ukuthi esokusele yikuthi uMbeki eyotshela inkokheli yomanyano weSADC ukuthi usehlulekile ukuthola iqhinga lokulungisisa udaba lweZimbabwe. Kunjalo nje, inkokheli yalamabandla ibikwa isuke lamuhla ilubhekise eSouth Africa kunkulumo zokuzama ukumanyanisa lamacele phambilini kokhetho.
Ingcwethi ecubungula ezombusazwe njalo engumgcinisihlalo wabasakhulayo kunhlanganiso edinga isisekelo sombuso esitsha, iNCA, uMnu. Alois Dzvairo utshele iStudio 7 ukuthi inkulumo zokukhumisana umlotha zazivele zikhanya ukuthi zizaba liphutha ngoba zisenzelwa ensitha.