Uhulumende sedlulisele phambili ilanga lokuhlala komthethwandaba oyamukela amabizo alabo abafuna ukuncintisa kukhetho oluzayo - iNominations Court - lisuka ngoLwesihlanu mhlaka 8 liviki lisiyakumhlaka 15 ngoLwesihlanu kuviki ezayo.
Uhulumende uthi wenze lokhu ngenjongo yokupha amabandla azancintisa isikhathi esaneleyo ukuthi bazilungiselele ngokugchweleyo. Ukudluliselwa phambili kwalelilanga sokuhle kwaqhelisa lesikhathi sokuthi abantu bayehlola amabizo abo ukuthi akhona kuluhlu lwamabizo alabo abalelungelo lokuvota, kutsho inhlanganiso ehlaziya imithetho iVeritas.
Ngalokhu ukuvalwa kokubhalisa ukuvota sokuzakwenziwa mhlaka 14 ngeviki ezayo.
Kunjalo nje umeli weTsholotsho edaleni lephalamande uMnu Jonathan Moyo ebambene loNkosazana Magreth Dongo owayengumkhokheli webandla le Zimbabwe Union of Democrats besebevele sebekhweze udaba emthethwandaba weHigh Court befuna ilanga leli lidluliselwe phambili.
Ekhuluma lentathelizindaba yethu uNtungamili Nkomo, umsekeli wesikhulumi secele leMDC elikhokhelwa nguMnu Morgan Tsvangirai uNkosazana Thabitha Khumalo uthi bayalamukela lelinyathela ngoba libapha ithuba lokwenza amalungiselelo abo bechelesile.
UNtungamili Nkomo uxhume njalo umsekeli wesikhulumi secele leMDC elikhokhelwa nguMnu Arthur Mutambara uMnu Abednico Bhebhe othi laloba besamukela lelinyathela, kukhanya umongameli Mugabe elenjongo ensitha. Ingwethi ecubungula ezombusazwe uMnu George Mkhwananzi uthi kusobala ukuthi uMugabe udlulisele lelilanga phambili ngoba efuna ukuqala athungathe abahlamuki bonke kubandla lakhe.
Solokhu sikudaba lunye, abazancintisa kulolukhetho bemele icele leMDC elikhokhelwa ngumnu Arthur Mutambara basole inyathelo leli besithi yindlela nje kahulumende eyokuzama ukupha iZanu PF isikhathi ukuthi izilungisele ngoba ikhaya isenkingeni okwamanje kulandela ukuhlamuka kukaMnu Simba Makoni kulelibandla.
UMnu Makoni wazise izolo ukuthi uzancintisa kukhetho lokudinga umongameli ezimele ngoba evinjwe libandla lakhe iZanu PF ukuthi enze lokhu lize likhethe umongameli Robert Mugabe. Intathelizindaba yethu esakaza ikoBulawayo uThabang Mathebula uxoxe labanye babazamela icele likamnu Mutambara abasola lelinyathelo kakhulu.