Uhlelo lokubhaliswa kwamabizo kuluhlu lwabalelungelo lokuvota luphele lamhlanje ngoLweSithathu. Uhlelo lolu belumele luphele ngeviki edluleyo kodwa lwadluliselwa phambili ukupha ithuba labo ekade bengabhalisanga ukuthi bayebhalisa.
Abenhlanganiso ezizimeleyo bathi ukwengezwa kwesikhathi lokhu kakuncedanga kangako ngoba abantu abanengi bengayanga bhalisa ngokungazi ngaloluhlelo kumbe ngokungabi lendaba lokuyavota.
UNtungamili Nkomo weStudio 7 ubelengxoxo lomqondisi weCrisis in Zimbabwe Coalition uMnu Xolani Zitha othi balutshwana abantu abazakuyavota kukhetho oluzayo njalo abanye bazehluleka ukuvota ngoba bengazi ukuthi ukuqunya qunywa okwenziwe izigaba kubatshiye bengaphi, ngakho ke kumele bavotele ngaphi.
UNtungamili Nkomo uxhume njalo uMnu Abednico Bhebhe isikhulumi secele leMDC elikhokhelwa nguMnu Arthur Mutambara othi labo kabasuthiseki ngendlela uhlelo lokubhalisa eqhutshwe ngayo.