Umkhokheli welinye lamacele eMDC uMnu Morgan Tsvangirai, yena obanjwe inkunzi izolo eJohannesburg, South Africa ngabantu abathathu abalokhu bengakabanjwa uthi ibandla lakhe kalizikhathazi ngokungena kukaMnu Simba Makoni kukhetho lokudinga umongameli esithi lolo luhlupho lweZanu PF hatshi olwebandla lakhe.
Ekhuluma emhlanganweni awenze lentathelizindaba lamhlanje ekuseni, uMnu Tsvangirai uthe ibandla lakhe kalitshaywa luvalo ngokungena kukaMnu Makoni ezimele kwezombusazwe wathi kwezombusazwe abantu kabakhangeli muntu kodwa bafuna lokho azabasiza ngakho.
Uthe bayamemukela uMnu Makoni ekuphikiseni urRbert Mugabe njalo bayathaba ukuthi laye usezosadalala phansi kombuso woncindezelo abewukholisa esakubandla leZanu PF.
Ubuye wathi kulethemba lokuthi ukungasuthiseki ebandleni leZanu PF kungenza uMugabe aphunyukwe zintambo zombuso. Esekhuluma ngokwehluleka kwenkulumo phakathi kwamacele eMDC womabili u Tsvangirai uthe lezo nkulumo kazizange zibaphe ithemba ngakho babona ukuthi kakusizi ukuthemba zona ekunqobeni ekhethweni.
Esebuzwa ngonozindaba phezu kwalezo nkulumo ebezikhokhelwa nguMnu Mbeki phakathi kweMDC le Zanu PF u Tsvangirai uthi zahle zafadalala ngesikhathi uMugabe ememezela ilanga lokhetho kungakabi lesisekelo sombuso esitsha. Wengeze wathi ibandla lakhe kalisazihluphi ngalezo nkulumo ngoba uMugabe wakhombisa ukuthi akathembekanga.
Kusenjalo ingcitshi kwezokwemuka kwabantu emazweni abo uMnu Mlamuli Nkomo utshele intathelizindaba yethu uBenedict Nhlapho ukuthi inkulumo ka Tsvangirai itshiya abantu bengaselathemba lokuthi intambo zombuso zizasuka ezandleni zika Mugabe.
Amazwi akhe abuye agcizelelwa nguNkosikazi Joyce Dube owenhlanganiso yeSAWIMA laye othi ithemba lizavelaphi sekulenhlangothi ezintathu ezilwisa umuntu munye kodwa zisehluleka ukubambana. Kusenjalo ukuhlaselwa kukaTsvangirai labanye bakhe ngamasela izolo, kwethuse abanengi abanye sebeze bethi kukhona okusegudwini ngaleso senzo.