Iqembu lenguqu eleHighlanders lizalubhekisa kwele Mozamique ngoLwesine lilanda umdlalo walo okhona ngeSonto oweConfederations Cup leqembu le Ferreviaro de Nampula. IBosso inqobe leliqembu 3-1 kumaviki amabili edluleyo.
IBosso ibibhekane lobunzima bokuthola i US$40 000 eyokuthengela abadlali amatikiti endizamtshina, kodwa iqembu leli libikwa liyitholile limali lamuhla njalo lizasuka kusasa ngehola lesine ntambama lilubhekise kweleSouth Africa andubana lidlulele kweleMozambique.
Umdlali waleliqembu uGift Lunga utshele uNtungamili Nkomo ukuthi asebekulanda eMozambique yikuyaqedisa nje i de Nampula ngoba befuna ukuhlohla igole elilodwa nje.