Abamamabandla ezombusazwe baphatheke ngemihlangano yokukhankasela ukhetho kuzigaba zonke zelizwe ngalimpelaviki. UMnumzana Simba Makoni uphakathi kokwethekelela izigaba zemaphandleni eMasvingo njalo kusasa uyabe esedolobheni leMasvingo ehlangana lozulu.
Abecele leMDC elikhokhelwa nguMnumzana Morgan Tsvangirai lilomhlangano omkhulu eGweru kusasa laloba lizakuba leminye imihlangano emincinyane kwezinye izigaba zelizwe. Inkokheli yecele elikhokhekhelwa nguMnumzana Arthur Mutambara layo isabalele ilizwe lonke jikelele ihlangana labasekeli. Umsekeli wesikhulumi salelicele uMnumzana Abednico Bhebhe uthi imikhankaso iqhubeka kuhle ilizwe lonke jikelele.
Kunjalo nje abecele elikhokhelwa nguMnumzana Morgan Tsvangirai bathi sebediniwe yikuhlukuluzwa ngamapholisa ebavimba ukuqhuba inhlelo zalo zokukhankasela ukhetho. Okunengi asikuzweni kumsekeli wesikhulumi salelicele unkosazana Thabitha Khumalo.
Kusigaba sethu sokukhulumisana labancintisa kukhetho iStudio 7 ibelethuba lokuxoxa loMnumzana Clemence Sibanda okhankasela ukhetho lwephalamende esigabeni se Matobo South. USibanda ukucele le MDC elikhokhelwa nguMnumzana Arthur Mutambara. Abanye abakulo umncintiswano kulesisigaba nguNkosikazi Sithembile Mlotshwa wecele leMDC elikhokhelwa nguMnumzana Morgan Tsvangirai loMnumzana Nicholas Nkomo webandla le ZANU PF.
Imizamo yokukhuluma lababili laba yehlule, kodwa nxa belesifiso sokuthi sibathinte ecingweni bangasithumela ama text messages besipha inombolo zabo zocingo. Inombolo zocingo zeStudio 7 zithi 1-202 465 0318.
USibanda uthi kunengi asekwenzele isigaba se Matobo South engekho kudale lephalamende, njalo engangena kulelidale uzakwenza umsebenzi omkhulu ukwedlula lapho.