Umongameli Robert Mugabe ubikwa esithi usedinge imitshina yokukhanyisa, ama generators ukuthi abe sendaweni zokuvotela, ukwenzela ukuthi ugetsi engacitsha ngelanga lokuvota, abantu bengaphambaniseki.
Kukhangelelwe ukuthi abantu abafika izigidi eziyisithupha bazavota endaweni eziyi nkulungwane eziyisitshiyagalolunye elizweni kusukela ngehola lesikhombisa ekuseni kusiya kuhola lesikhombisa ntambama ekupheleni kwayonale inyanga. Okhokhela iqula le South Africa elihlola ukhetho eZimbabwe, uMnu. Kingsley Mamabolo uthi umumo ulungele ukhetho elizweni, njalo uMnu. Jose Marcos Barrica okhokhela iqula lomanyano we SADC uthi ukhetho luzabe lukhululekile. Inhlanganiso ye ZEC layo ithi amalungiselelo okhetho asemaphethelweni.
Kodwa ngakwelinye icele, amabandla aphikisayo ayakhonona ngokuthi ayahlukuluzwa njalo ukhetho luyabe lungakhululekanga. USithandekile Mhlanga we studio 7 uxoxe lo Mnu. Busani Ncube, ingcwethi ecubungula ezombusazwe, ukuze sizwe imbono yakhe ngaloludaba.