UMnu. Samuel Siphepha Nkomo, oncintisa kukhetho lokudinga ozamela isigaba seLobengula ko Bulawayo edaleni lephalamende, ekucele le MDC elikhokhelwa nguMnu. Morgan Tsvangirai, utshele uSithandekile Mhlanga we studio 7 ngembali yakhe kwezombusazwe lakuthembisa abantu balesisigaba enganqoba kulolukhetho.
USithandekile Mhlanga we studio 7 uphinde waxoxa lo Mnu. Dingulwazi Masuku, oncintisa kusikhundla esifanayo, ekucele le MDC elikhokhelwa nguMnu. Arthur Mutambara, yena othi ulethemba lokuthi uzanqoba kulesisigaba ngoba ekhulele khona njalo ekwazi okuhlupha abantu.
Kunjalo-nje, uAlderman Alexious Sibanda oncintisa esikhundleni esifanayo ekubandla le PUMA, ubengukhansila kulesisigaba okweminyaka elitshumi lambili, ekubandla le ZANU PF, njalo wake waphatha isikhundla sikaMayor wedolobho lako Bulawayo, waphinda waba ngumsekeli ka Mayor kulelidolobho. USibanda utshele uSithandekile Mhlanga we studio 7 ukuthi ufuna ukuncedisa isigaba lesi ngokuqedisa ukwakha isikolo se Sikhulile Secondary, ukuvuselela ikilinika engasebenziyo, kanye lokwakha indawo yokufundela amabhuku, ilibrary.