Ingcwethi kwezombusazwe kwele South Africa zithi ukukhonona kwamalunga eZanu PF ngenkokheli yalelibandla kulakho ukubangela ukudilika kwalo ngemva kokhetho kungakhathalekile ukuthi umongameli Robert Mugabe unqobile kumbe hatshi.
Omunye walezingchwethi, uMnu Shadrack Ghutto, ongumqondisi wohlangothi lweCentre for African Reinaissance Studies eUniversity of South Africa, ekhuluma kungxoxo ebiphezu kokhetho lweZimbabwe emsakaweni weSABC 1 izolo, uthe amalunga eZanu PF akhanya esefuna inguquko ngoba sekubona ukuthi uMugabe ngeke enelise ukulungisisa umumo okhona.
Wengeze wathi sokucaca ukuthi laloba umongameli Mugabe engaze enqobe ekhethweni sebebanengi abamzondayo phakathi kwebandla lakhe, ngakho loba enqobile kumbe enqotshiwe kungenzeka ngemva kokhetho kube lamaqenjana aphuma kuleli bandla etshengisela ukungasuthiseki kwawo.
Lokhu kubuye kwagchizelelwa nguMnu Ngqabutho Dube oweMDC ekhokhelwa nguMnu Arthur Mutambara othi kuyabacunula ukubona ukuthi wonke amaqula aseZimbabwe ukuyahlola ngokuqhutshwa kokhetho akhanya enganaki ngokubi okwenzakala kumalungiselelo okhetho, kubika intathelizindaba yeStudio 7, uBennedict Nhlapho.