Uhulumende weleSouth Africa ukhanya seguqule ingqondo ngodaba lweZimbabwe wathi kumele impumela yokhetho yethulwe ngokutshetsha. Ngempelaviki edluleyo, uMongameli waleli lizwe, uMnu. Thabo Mbeki umangalise umhlaba ngokuthi eZimbabwe akula nkinga.
Kodwa isikhulumi sikahulumende wakhe, uMnu. Themba Maseko utshele intathelizindaba ukuthi lapho okwenziwa khona ukhetho kumele impumela yakhona yazakale masinyane ngoba ukuphuza kungelaziziatho ezibonakalayo kulakho ukudala ukungezwani elizweni. UMaseko ubegcizelela okwanqunywa ngumanyano weSADC ngempelaviki edluleyo emhlanganweni wesiphangiphangi owabizwa ukuzaxazulula ingxabangxoza yokhetho lweZimbabwe.
UMaseko uthe umanyano weSADC uzaba lomunye njalo umhlangano limpelaviki kukhulunywa ngokhetho lweZimbabwe njalo uhulumende wakhe uzasa abahlola ukhetho ukuthi bayephathisa ngokubalwa kutsha kwamavoti nxa kuzenziwa njalo. Ingcwethi ecubungula ezombusazwe, uMnu. Mlamuli Nkomo uphe uChris Gande weStudio 7 imbono yakhe ngololudaba.