Umqeqetshi weqembu le Monomotapa u Norman Mapeza engaba ngumqeqetshi wakuqala ukulahlekelwa ngumsebenzi ngemva kokwehluleka kweqembu lakhe ukuthola loba owodwa umklomelo selokhu imidlalo yalonyaka iqalile. Intathelizindaba yethu yezemidlalo u joseph njanji usipha loludaba ndawonye lezinye.
I Monomotapa ihlezi ngaphansi kwengalane yemiklomelo ngemva kokutshaywa emidlalweni yomine esiyidlale lonyaka njalo kulimpelaviki ibhuqwe 3 ka nya yi Chapungu okutshiye inengi elilandela umdlalo kanobhutshuzwayo likhomba u Mapeza njengomqeqetshi olakho ukuphelelwa yisikorobho maqala lonyaka njengoba abanye abakade bekusimo esifana lesakhe sisiya kumidlalo yangempelaviki u Max Malume Moyo we Lancashire Steel lo Beavan Gwamure we Underhill bephefumule ngcono ngemva kokuthola kwamaqembu abo imiklomelo yakuqala lonyaka ngemva kokuba i Lancashire ibe ngutshiki lobhanqa 1 ka 1 le Highlanders izolo kuthi i Underhill idlale ngokufanayo le Motor Action emdlalweni obukhona ngoMgqibelo. Komunye umdlalo obukhona ngoMgqibelo i Kiglon ibhule i Lengthens nge 3 ka 1 okuyimpumela etshiye leliqembu elingene lonyaka esigabeni saphezulu selivule isikhala semiklomelo emine phezu kwengalane yemiklomelo. Ngensonto i Sundowns itshaye i Shooting Stars nge 3 ka nya, i Dynamos le Masvingo United zibe ngutshiki lobhanqa 1 ka 1 kwaba ngesifanayo phakathi kwe Caps FC le Gunners eziqede umdlalo kuyi 1 ka 1.
Kolunye udaba olumayelana lomdlalo kanobhutshuzwayo iqembu labaleminyaka engaphansi kwengamatshumi amabili linqotshwe 1 ka nya ngabosowabo base Lesotho kuhlandla lakuqala lomdlalo wokudinga amaqembu azakuyaphatheka emicintisweni we Africa Youth Championships.
Owenza izifundo zemidlalo u Sdani Dlodlo uthi iqembu lakuleli lilakho ukudlulela kusigaba esilandelayo uma lingasebenzisa ithuba lokudlala lisekhaya kuhlandla lesibili lalumdlalo elizakuba kuleli ngemva kwamaviki amabili ikakhulu nxa kukhangelwa ukuba i Zimbabwe icine idlala lumdlalo ingela badlali abeneleyo ngoba ababili sebetshengiswe ikhadi elibomvu.
Sikhangele impumela yemidlalo kakhilikithi kumncintiswano wesigaba sakuqala ku Logan Cup oqale ngempelaviki edluleyo. Iqembu le Northerns lona elalisaziwa ngokuthi yiMashonaland linqobe i Easterns yona eyayisaziwa ngokuthi i Manicaland ngama runs ayi 65 kuthi i Centrals eyayisaziwa ngokuthi yi Midlands inqobe i Westerns yona eyayisaziwa ngokuthi yi Matabeleland ngama wickets ayisikhombisa.