Umkhokheli wecele leMDC elithi lanqoba kukhetho lukamongameli uMnu Morgan Tsvangirai uqhubekele phambili ngemizamo yakhe yokudinga uncedo losekelo kudaba lokhetho lweZimbabwe ngokuhlala umhlangano lonobhala jikelele womanyano wamazwe omhlaba owUunited Nations, uMnu Ban Ki-Moon eAccra, Ghana lamuhla.
UMnu Ban, yena osemhlanganweni weUN ohlaziya okuphathelane lokuthengiselana kwamazwe omhlaba ngomunye osephose elakhe esola okwenzakala eZimbabwe njalo uveze ukuthi uzahlaziya udaba lolu lenkokheli yamazwe eAfrica kulumhlangano. UMnu Tsvangirai ubikwa ecele uMnu Ban ukuthi umanyano weUN wenze konke okusemandleni awo ukuthi umongameli Robert Mugabe abanjwe ngamandla ukuthi ethule impumela yokhetho njalo etshiye intambo zombuso ngoba enqotshiwe.
Kusenjalo umanyano weSadc uthi umongameli Thabo Mbeki kumele eqhubeke engumlamulankunzi kudaba lweZimbabwe laloba uMnu Tsvangirai ecele lumanyano kuviki edluleyo ukuthi umsuse uMbeki kulesisikhundla ngoba eseyehlulekile.
Lokhu kwenzakala ngesikhathi lumanyano uchothozwa ngabanengi ngokwehluleka ukungenela ulungisise udaba lweZimbabwe. Ingcwethi ecubungula ezombusazwe uMnu Emmanuel Hlabangana utshele uNtungamili Nkomo weStudio 7 ukuthi inyathelo leSadc leli lidanisa hatshi, iMDC kuphela kodwa lozulu nje jikelele olombono owokuthi uMbeki emiswe lumsebenzi kukhethwe umlamulankunzi omutsha.