Iqembu le Highlanders seliphumile kumncintiswano we Confederations Cup ngemva kokubhuqwa liqembu le El Merreikh lase Sudan.
I Highlanders itshaywe nge 3 ka 1 emdlaweni obuse Sudan (izolo) ngeNsonto, okutsho ukuba nxa sekuhlanganiswa lempumela yomdlalo wakuqala owaba phakathi kwalawa maqembu kuleli owaphela iqembu lase Sudan linqobe nge 2 ka nya i El Merreikh inqobe nge 5 ka 1.
Owenza izifundo zemidlalo u S'dani Dlodlo uthi aluba i Bosso ithela imali kumaqembu ayo abasakhulayo lokuthuthukisa i zakhiwo zayo ezifana lenkundla ezise Clubhouse kulokujikela imali emgodini ongela mkhawulo ngokuphatheka kumncintiswano yokudinga intshantshu zezwekazi lase Africa lapho elingazake lifinyelele khona kusigaba esilemali kusukela ngeminyaka yabo 1980.
Kusenjalo iqembu le Dynamos lenze izimanga lafinyelela kusigaba esilandelayo esomncintiswano we African Champions League lapho litshaya intshantshu zanyakenye ele Etoile Sportive Du Sahel yase Tunisia nge 1 ka nya khonale e Tunisia okutsho ukuba elsekhaya linqobe nge 2 ka nya nxa sekuhlanganiswa impumela yemidlalo yomibili edlalwe yilawa maqembu.
***********************************************
Sikhangele impumela yemidlalo ye Premier Soccer League ebikhona ngempelaviki. NgoMgqibelo iqembu le Chapungu lelule inani lemiklomelo elikhokhela ngayo phezu kwengalane yemiklomelo laya kwelitshumi lasikhombisa ngemva kokunqoba kwalo i Shooting Stars nge 2 ka 1. I Kiglon yona ebiqale ngesikhulu isiqubu ngemva kokungena kwayo kusigaba saphezulu ibe ngutshiki lobhanqa le Caps FC 0 ka 0. I Sundowns itshaye i Motor Action nge 3 ka nya, i Underhill inqobe i Lengthens ngemiklomelo emithathu, i Monomotapa idle i Lancashire Steel nge 3 ka 2, Emidlalweni yangeNsonto i Masvingo United idle i Eastern Lions nge 1 ka nya kuthi i Gunners ikhulele i Caps United nge 3 ka 2.
Abasiki bebunda bathi isimo simi manzonzo kuqembu le Caps United njengoba kulemibiko ethi ukungezwani phakathi kwabaqeqetshi u Luke Masomere lomsekeli wakhe u Gishon Ntini sokungene lakubadlali okudale ukuba isikhundla sika kaputeni sisuswe ku David Kutyauripo ngoba kulabanye abadlali abathi bona balesikhathi eside bedlalela leliqembu kulaye ikanti lomdlali wasenkabeni u Benard Benesi ubikwa etshayiswe unyawo ngoba eyale ukugeza ngomuthi phambilini komdlalo wezolo kuthiwa akalaleli u Masomere ngoba eke wasebenza lo Ntini kuqembu le Shooting Stars. U Benesi yena uthe iqembu alikamazisi ngokuxotshwa kwakhe kodwa useke wezwa ngakho etshelwa ngabanye abadlali.
************************************
Iqembu elimela ilizwe emdlalweni we golufu kucele labesifazane liphutshe likusigaba sesithathu emncintiswaneni we All Africa Challenge Trophy oqhutshelwe elizweni lase Egypt ensukwini ezimbalwa ezedluleyo. Leliqembu ebelibunjwa ngabadlali abathi u Rumbi Masamvu, uClaire Minter kanye lo kaputeni u Jessie Nyakatawa liqede imidlalo yalo lingemva kwe South Africa kanye le Egypt njalo limidlalo ingenwe ngabadlali abangamatshumi amane lanhlanu abakade bephuma emazweni alitshumi lanhlanu.