Icele leMDC elikhokhelwa nguMnu. Morgan Tsvangriai lithi ilunga lalo, uMnu. Better Chakururama utholakale efile eMurehwa ngeSonto ngemva kokubhaxabulwa ngabasekeli beZanu PF. Kuthi elinye njalo ilunga, uMnu. Tonderai Ndira uthunjiwe emuzini weMabvuku eHarare emadabuka kusa ngabantu kade behlome ngemibhobho abacatshangelwa ukuthi zinsoli zikahulumende.
Ibandla leli lithi sekufe amalunga alo angamatshumi amathathu lanhlanu sekulokhu kwaqhamuka udlakela lwezombangazwe ngemva kokhetho olumanyanisiweyo. Izakhamizi zemaphandleni zibikwa lokhe zilimala zitshaywa ngabasekeli bezanu pf zibalekela imizi yazo ngenxa yaloludlakela.
Kunjalo nje, ugatsha lwabomama kubandla le ZANU PF soluthumele amalunga alo angaphezu kwekhulu eNkayi ukwethusela abasekeli be bandla le MDC abathi bazabulawelwa ukuvotela u Morgan Tsvangirai kanti njalo bahamba bebhala amagama abantu okuthiwa kumele babulawe loba batshiselwe imizi.
EMzingwane uzulu usebanjwe ngamandla ukungena emihlanganweni lapho atshelwa khona zinduna ukuthi kumele avotele u Mnu. Robert Mugabe kukhetho oluzayo Ababengabalweli bempi yenkululeko babikwa beqhubeka be sakha inkamba zabo ezigabeni ezitshiyeneyo zelizwe, ikakhulu emaphandleni, lapho okubikwa kulodlakela olwesabekayo kanye lokuhlukuluzwa kwabantu.
UMnu. Moses Mzila Ndlovu, omela iBulilima edaleni lephalamende, ekucele le MDC elikhokhelwa nguMnu. Arthur Mutambara, njalo engumgcinisihlalo walelibandla esigabeni seMatabeleland South, utshele uSithandekile Mhlanga we studio 7 ukuthi ukwethuselwa kwabantu kuyaqhubeka kulesisigaba ngokubizwa kuthi yi Operation ‘Mana Uqonde’, eyenziwa ngabazithi babengabalweli benkululeko kanye labatsha abasekela ibandla le ZANU PF.
