Imigwaqo ye Johannesburg ibikwa ibithule lamuhla kodwa kulokwesaba kwezizalwane zakwamanye amazwe. Izizalwane zeZimbabwe ezinengi zibikwa zibaleka eSouth Africa ngemva kokubulawa kwabantu bokuza abedlula amatshumi amahlanu kumaviki amabili adluleyo kwathi inkulungwane ezedlula amatshumi amahlanu zatshiywa zingaselazindlu.
Lanxa bekuthule lamuhla eSouth Africa jikelele inhlanganiso ye Red Cross ithi izizalwane zeZimbabwe ezedlula inkulungwane ezingamatshumi amabili lanhlanu zisuke kulelolizwe zilubhekise eZambia. Kuthi eziyinkulungwane ezinhlanu lanhlanu zibikwa zilubhekise eMozambique. Kwenye inkamba eseduze lomngcele weleBotswana kubikwa kuphiwe uncedo izizalwane zeZimbabwe ezingamakhulu amathathu. Ibandla leMDC libikwa liphe uncedo lwamabhasi wokuya ekhayo izizalwane zeZimbabwe ezinengi kusukisela kuqhamuke loludlakela kumaviki amabili adluleyo.
Esinye isizalwane seZimbabwe esaphephelela esontweni ye Methodist eJohannesburg, uMnu. Phineas Matsalala utshele uChris Gande weStudio 7 ukuthi kunzima kakhulu ukuthi abantu bacabange ukubuyela ekhaya.