Udlakela lwezombusazwe selufike kusibanga esesabekayo amabandla amabili, iMDC leZanu PF ephoselana inyoka ephilayo ngaloludaba.
Ibandla leMDC lithi sekufe amalunga alo edlula amatshumi ayisithupha yikho amalunga alo asezivikela lapho ahleselwe. Kuthi ngakwelinye icele iZanu PF layo ithi amalunga ayo ayazivikela nxa lapho esegongodwa ngamalunga eMDC.
Iphephandaba leHerald lithi ngempelasonto ebikita amalunga eMDC abulele owalwa impi yenkululeko, uMnu. Mabiko Mudzingwa ngemva kokuqhamuka kokulwisana okwesabekayo eChigumisira Business Centre kwatshiswa imizi yabantu eminengi. Kodwa kubikwa kutshiswe imizi eminengi yabasekeli beMDC. Isikhulumi samapholisa, uMnu. Wayne Bvudzijena uthi izindlu lezi zitshiswe ngabasekeli beZanu PF kade bezivikela.
Ababulawele izindlu ebikita bagoqela owayengumeya wedolobha leHarare, uMnu. Elias Mudzuri. Enkabazwe udlakela lolu lubikwa selusidla ubhedu. EGokwe koSerima kubikwa kutshaywe abantu abanengi izolo ngabantu kade begqoke impahla zamasotsha omunye wabantu laba ulimele kakubi wasiwa esibhedlela kodwa walandelwa ngabantu laba bamthumba. Umgcinisihlalo wenhlanganiso ezizimeleyo, iNANGO, enkabazwe, uMnu. Peter Muchengeti utshele uChris Gande weStudio 7 okunengi ngodlakela lolu.